Pottenstein, Rechte der Holden des Stiftes Heiligenkreuz (1431)

Vermerkcht unsërn holden recht ze Potenstain. de schullen si all jar melden in dem pantaiding.

Des ersten, daz: ir viech schol gen mit der purger viech wo daz hin get.

Daz ander, daz si sullen haben auf unserm güt einen gibmeczen und schullen den alsant. nuczen und schullen den ab dem güt niemant leichen.

Daz drit: wann dew unsern kaufent zimerholz auf des von Walsse gut und wellent damit pessërn unsere gütter, do schullenn si chain maut von geben.

Daz vierd: wann ainer umb erber sach fleucht auf unser guet, den schol chain richter darauf nicht vahen ân unsers ambtmans willen.

Daz funft: wer in ir frid aufpricht und wirt pegriffen, der schol den schaden pessërn und ist uns vervallen eins freveln wandels.

Daz sechst: wer in unsërn weingarten oder paungerten scheden tëtt pei der nacht [oder] in unsern höffen, man sol in anruffen. melt er sich nicht, slueg man in daruber ze tad, wir sein dem gericht darumb nichtes vervallen.

Daz sibent: wër lusent an unsern venstern, und ruff wir in an und melt er sich nicht, slueg wir in ze tad, wir sein nichtz darumb vervallen.

Daz ächt, daz wir ein ambtman seczen mit der hilf unsërr herren wann uns ainer nicht gevelt.

Daz neunt: auf unsërm güt ein chlagwandel 12 phenning.

Daz zechent: was wïr inner haus hingeben, daz wir daz nicht mauten.

Daz aindleft: was wïr aus unsërn paungerten ausfüern, daz wir auch des nicht mauten.

Daz zwelft: wo der richter oder sein nachrichter mit frevel aufstiess auf unserm guet, der ist unserm herren dem abbt und dem gotzhaus daz gross wandel.

Daz dreizehent, daz auch der nachrichter auf unserm güt in chain ander haus nicht gen schol, umb we daz sei, sunderleich er schol nüer gen hinz dem ambtman.

Herrschaft
Heiligenkreuz
Standort
Heiligenkreuz | BH: Baden | Bundesland: Niederösterreich | Eigentümer: Stiftsarchiv Heiligenkreuz | InvNr.: Urbar über die Zinsen und Renten des Stiftes Heiligenkreuz diesseits der Donau | Seiten: 176c-d |
Herkunft / Fundort
Pottenstein | BH: Baden | Bundesland: Niederösterreich |
nähere Angaben
Entstehung: 1431 |
Literaturhinweise
Gustav Winter (Hg.), Niederösterreichische Weistümer. Teil 1: Das Viertel unter dem Wiener Walde (Österreichische Weistümer 7). Wien-Leipzig 1886, S. 385-386, Nr. (Edition).

Kategorien: Rechtsquellen | Taiding - Dorf | Taiding - Kloster

<< zurück