imrealDB

Alda hat die herrschaft Merckhenstain ain mauth nur allain von der herrschaft underthonen so auß dem Fuertter oder Muggendorffer ambt. fahren, ieder 2 dn, welche der richter einnimbt und gibts der herrschaft.

Item, wan man wein durchfüert, er seie wer da welle, niemant ausgenomen, so solle der richter ain achterin von iedem vaß heraußlassen, die ain halbe sambt dem fuerman und andern außtrinken, die aine halbe solle der richter haimbtragen, die gehört der herrschaft Merckhenstain zue, und ir derowegen raitung thuen, und ist von uralten jarn allso herkomen. wann aber glaubwierdig fürkompt das der wem so man füert kain hungerisches gewäx, so steet es bei des richters wilkür das er die aine halbe so der herrschaft Merckhenstain gebürt mit gelt ablössen lasset.

Wer hungerischen wein durchfüert, der ist der herrschaft Merckhenstein ohne alle widerred verfallen. allain die auß der Neustatt sein befreiet das sie hungerischen wein durchfuern mügen, doch das sie auf das vaß iren brant brennen und ain passierzettl geben; die weinkost aber muessen sie so wol als andere dorten raichen. und ist von alter allso herkomen.

Man ist schuldig dorten alles holzwerk in billichem kauf anzufailn, und so mans nit kaufen wil so mag er es weiter füeren. wann er es aber an ainem andern ort, es seie zu S. Veit oder anderstwo, ablegen wil, so soll er es zu Potenstain abzulegen schuldig sein.

Man hat alle wochen am pfingstag ainen gewöndlichen wochenmarkt; alle jar drei kirchtag: zu zwaien unser frawen tag und den pfinztag nach dem aschermitwochen ist ein kierchtag, denselben hüeten.

Des pfarrers zu Pottenstain holden so zu Potenstain und an underschidlichen orten in der herrschaft wohnen, die raichen allain dem pfarrer den gruntdienst und mit robat und allem gehorsamb gehören sie geen Merckhenstain, sein auch der herrschaft wie die anderen aignen underthonen anglübdt. und ist von alter allso herkomen.

Alle wassergeben auf denen mülln und hamer im Weyssenpach geschehen mit bewilligung der herschaft Merchenstain, und wan iemant etwas zu bawen von nothen so ersuecht er es bei dem richter zu Pottenstain, der gelangt es darnach an die herschaft. also auch wirdt es mit dem wasserabschlagen gehalten, daß keiner ohne vorwissen des richters zu Pottenstain das wasser abschlagen solle. und bishero iederzeit also gehalten worden.