imrealDB

Alle jar zwai freie dading, ains sol am sontag nach Jorgen tag alle jar gehalten werden, das ander sol alle jar gehalten werden am sontag nach sant Jacobs tag. soliche dading gehoren zu der herschaft Craniperg.

Zum ersten artickl bekenen si der herschaft Craniperg ain freien berg, all handl und wändl derselben herschaft Craniperg.

Wo ainer fravel trib der ain ritter oder edlman wer, so ist er umb 32 tal. dn verfaln, wer es ain richter oder mulner so ist er verfaln zu wandl l0 tal. dn, ist es aber ain gemainer man so ist er verfaln 5 tal. dn oder ain hant.

Wo ainer nit pei dem pandading war den nit gotts gewalt saumet, der ist zu wandl verfaln 72 dn.

Von ainer ieden spangen 12 dn, von ainer seiln 24 dn.

Alle die in dem perg haben und nit vermachten, so ist er zu wandl verfaln 72 dn und dem andern sein schaden abzutragen.

Ain ieder sol raumen. wo aber ainer ain schaden emphieng, so ist derselb 72 dn und dem andern sein schaden abzutragen.

All steg, all weg, all gassen gen weingartn wandl sind 72 dn.

Am sontag nach dem leßtag so sol ain ieder sein most geben und ain stund vor tag weg damit.

Ob ainer zu rechter zeit nit kam mit dem most, so ist er in schuldig nachzufurn bei sunenschein gen Neukhirchn. bringt ern aber nit gen Neukhirchn, so sol er den gar gen Craniperg fuern.

Wann ain gueter man ain weingartn hiet und hau in nit und dient in dem drittn jar nit, so ist er der herschaft Craniperg den grund verfaln.

Und ob man hielt, von ieder klä 12 dn, und die graserin auch 12 dn.

Ob ain frembder kam, so sol er dem hueter ruffen dreimal. antwort er im nit, so mag er weinper nemen uud damit weckgen. nem er aber mer, so sol man in antwortn wohin er gehort.

Mer sol der berkrichter und dorfrichter und die fierer mit ainander gen und sollen die perg und weg beschauen.

Item, der berkrichter sol inen ainen gueten man setzn der inen der frucht huet, damit si inen versehen sint.

Wo ainer von den huetern begriffn wiert bei nacht oder tag der schaden tat, sol er in dem perkrichter antwortn, so ist er dem hueter gr., dem pergrichter das wandl.