imrealDB

Wirflach, Bergtaiding (Anf. 16. Jh.)

Pergdading zu Wirflach so ain anders jar aufgeschriben ist worden.

Die herschaft Craniperg hat zwai freie bergdading zu Wirflach oder wer es inen hat.

Item, das ain dading am sontag nach sant Jorgen tag, das ander am sontag nach sant Jacobs tag. das ain ieder sol komen zu dem dading oder sein volmechtiger anwalt, ausgenomen gotz gewalt hinder dan ainen. und so ainer solichs nit weisn mocht und uber solichs ausplib, so ist er zu wandl verfaln 72 dn der herschaft.

Die herschaft Craniperg hat gefuerste freiung. ob ainer den andern jaget in den perg und dem andern nachkam, wär ain edlman so wer er der herschaft Craniperg verfaln 32 tal. dn, wer es aber ain richter so wer er ferfaln 10 tal. dn, wer es aber ain gemainer man so wer er verfaln 5 tal. dn oder die recht hant.

Ob zwen nachparn mit ainander ain weingartn hieten und setzet ainer dem andern ain rainstain nehender oder verer dan von alter herkomen, wer fravlwandl 5 tal. dn.

Ob ainer dem andern in dem perg etwas nem, es wer weinper opfl piern, sol in der bergrichter zu seinen handen nemen und dem hern von Craniperg in 3 tagen wissen lassn, und sol kochn auf 12 das 24 zu essen haben.

Ob ainer nit kam zu der ersten und andern frag, so wer es nicht. kombt er aber zu der drittn frag nit, so ist er das wandl schuldig.

Ob ainer ainem andern ainen stock durch seinen weingartn zuch in ain andern, so solt man anemen fur ain schedlichn man, so sol man denselbigen antwortn der herschaft gen Craniperg durch sein anwalt wo er dan hin gehort. und ob er ains vermugen wer, so sol es uber sein guet geen. ist er aber nit in vermigen, so sol ain ieder daselbs ain creizer geben damit derselb geantwort wert.

Ob ainer dem andern ain weingartsteckn nem zu den drittn mal auß seinem weingartn, wo man solichn erfur, so wer er ain schedlicher man.

All weg und steg die unrecht sint in dem perg, so ist sein wandl 72 dn wo er das wider sein willn tut. ist es aber ain fravl, so ist er per 6 ß 2 dn.

Ain ieder sol sein gassn raumen vor seinem weingart. und ob er das nit tuet, so ist das wandl 72 dn.

Welicher ain seuln [hat] zu setzen oder ain spangen und tut in den 14 tagen nicht, von der seuln 24 dn, von der spang 12 dn.

Ob ainer ain perkmaister verachtet oder ain fierer aus ubermuet, so ist das wandl 6 ß 2 dn.

Ob ainer ain ochsn in den perg hielt und demselben schaden tat und ob derselbig klagt, so ist er von ieder klaen schuldig 12 dn.

Es ist von alter herkomen: alle sambztag, alle zwelfpottntag. wer in den weingartn in den perg arbait und sich des pergmaisters setzet, so ist er schuldig 6 ß 2 dn.

Ob die graserin schaden taten in den weingarten, so ist das wandl von dem korb oder von ainem tuech 12 dn.