imrealDB

Etlich artickl die in das berkdading zu Wirflach gehorn und aus ainem altn grundpuchl bei grave Haugen von Mantfortauch Walter Zewings zeiten also gehandlt ist worden, ausgezogen.

Zu Wirflach, alle die perkmas geben die geben an drittn jar albeg steuerwein, ieder als vil er ain jar bergrecht gibt und dient.

So hat auch die herschaft zu Craniperg die recht auf dem Munichhoff zu Wirflach: wann den perg zu Wirflach und die leut daselbs ain not angieng, so sol man von demselben hoff zwelfen den die herschaft dachin schickt kost und habern geben uber nacht gnueg. man sol auch den zwelfen gen kuchn schrottn das genueg haben. und auf demselben hoff ist Berthel gesessn. und wan man die perkrecht vessent und einimbt, so sol man aber den meins herrn leitn und iren phertn genueg geben als dan von alter herkomen ist. die recht ruget man also an ir selbs rechten.

Es hat auch mein herr. sein selbs pergmaister da uber meins hern bergrecht und uber all andre pergrecht. davan gefellet dem pergmaister von dem der dachingibt von ainem emer 16 dn und der do kauft acht phening, ausgezogen die weingartn die do in iren hoff gehorn geben nicht.

Nach Cristi geburt vierzehenhundert darnach in dem sibenundzwainzigistn jar des nestn sontags nach sant Jorgen tag besaß Jorg der Gnäm die zeit bergmaister zu Wirflach das pergdading mit allen bergenossen. do wart erkant das der berg daselbs zu Wirflach in allen sachen frei und ledig ist zu dem stain gen Craniperg und sonst niemants gewaltz daruber zu kestichn. und wer auch daran jagen wolt, der sol das tun mit willen der herschaft zu Craniperg. dapei warn von erst der edl Wallther Zewinger die zeit inhaber des stains Craniperg, und die beschaiden Wolfgang Wurmprant, Cristoff Khirchenkhnopf, Larentz richter zu Piesting etc.; und das nach altem herkomen.