imrealDB

ermerkt daz pantaiding und die recht so wïr haben zu Eczleinstorff, als si mit alter herchömen sind.

Zu dem ersten mal, daz wïr haben süllen alle jar zu sand Jörgen tag ain pantaiding. und darzuo sol dieselb herschaft von Wienn kömen oder: ir potschaft senten; dieselb potschaft sol die gemain und holden daselbs selbdritten verzern und für sew bezaln. und in demselbigen pantaiding sol man melden alle die recht, vëll und wëndl als von alter herchömen sind; und melden daz alles bei unserm aid. und sullen darzuo haben drei sprach und ainn weiser.

Item, daz ain iegleich man oder fraw gesessen zu: Eczleinstorff sein süllen bei dem pantaiding. und wer darzuo nicht kumpt oder seinn scheinpoten sent, der ist wandls vëllig als von alter herkömen ist.

Item, ob ain güß kümpt und ob indert ainer daz wasser laitt auf seinn nachtpawrn, so ist er wandels verfalln 6 ß 2 dn.

Item, ob ainer dem andern mit frëvel nachleuf in sein haus, lauft er under die dachtrophen so ist daz wandel 5 tal. dn, lauft er aber gar hinein so ist daz wandl 10 tal. dn.

Item, ob ain frömbds viech kumpt in daz dorf, treibt es aber ainer ab dem weg mit seim viech und lët es nicht ausrüffen in drin tagen, ist es ain gross viech so ist daz wandl 72 dn, ist es aber ain klains daz wandl 12 dn.

Item, wïrft ainer ain slötergruob auf und füllt er die nicht wider zuo am dritten tag, ertrinkcht darinn ain groß viech so ist daz wandl 72 dn, ertrinkcht aber ain klains viech so ist daz wandl 12 dn; ob aber ain mensch darinn ertrinkcht, so sol er in püssen als ainn todslag.

Item, ob ainer ainn marichstain ausgrüb und mit frëvel auswürf, so ist er ze wandl verfalln 6 ß 2 dn.

Item, ob ainer ainen deup begreift in seinem weingarten, sticht er in zu tod und legt 3 dn auf in und ist ledig.

Item, ob ainer ainn stekchen austrët, als oft er daz tuot so ist daz wandl 12 dn trët ers aber an purdweis aus also daz man der stekchen nicht gezelln mag, so überwint man in als ainn schedlichen man.

Item, ob ainer truog ainn spies in frëvel, so ist daz wandl 72 dn.

Item, ob sich zwen zetrügen mit red, richtend si sich mit einander ee daz si von einander köment, so sind si niemand nichtz phlichtig. tëten si aber des nicht, so ist ieglicher ze wandl verfalln 72 dn.

Item, ob ainer wïrft in frëvel mit we daz ist, der ist ze wandl verfalln 6 ß 2 dn.

Item, ob ainer zukcht und nicht schëden tuot, so ist daz wandl 12 dn als oft er daz tuot; tuot er aber schaden, umb ain fliessunde wunden 2 tal. dn.

Item, ob ainer trët ain armst in frëvel. spannt er und legt nicht auf so ist er ze wandl verfalln 72 dn, legt er aber ainn pheil auf so ist er ze wandl 6 ß 2 dn; latt er aber ab und wie daz kümpt, so ist daz wandl fünf phunt phening.

Item, kain anderer richter sol nichtz ze pieten haben noch ze richten in kainerlai sach wenn die herschaft von Wienn und ir richter, es sei uber lembtig oder uber tod, ze veld oder ze dorf.

Item, umb allerlai sach do man pünt und peen aufseczen wil oder sol, do sol man niemant dann der herschaft von Wienn die vël und peen aufseczen und ertailn.

Item, die ganz gemain dïnt von ainer waid 18 dn und sind genant holzhünrphening. und dieselb waid ist vor ain haid gewesen, die sol niemand umbakchern noch umbreissen; wer daz überfür, der wër der herschaft ze wandl verfalln 72 dn als oft er daz tët, wenn dieselb haid ist der herschaft freis aigen. und wer in die dïnst nicht leiden wölt, des viech sol man auf der haid oder waid nicht geen lassen.

Item, all die obgenanten pünt, wëndl und peen als si oben benant sein habent die ganz gemain zu Etzleinstorff ertailt bei: irn aiden.