imrealDB

Hie sind vermerkt die recht des marks zu Salhenaw als die von alter herkomen sind und die man meldet in den pantaidingen, als man die zwaimal in dem jar sol besitzen und halten: das erst des negsten suntags nach sant Jörgen tag, das andermal des negsten suntags nach des heiligen creuz tag im herbst. und das ist also gehalten worden do man zelet nach Cristi gepurt tausent vierhundert und zwelf jar.

Die pantaidingen sol der richter zu Salhenaw alle jar besitzen und halten in beiwesen des phlegers zu Schönaw mit den vierern und mit den richtern der herschaft Schonaw die er darzu vordert, bei der peen 5 tal. dn der herschaft Schonaw verfallen.

Item, zu den pantaidingen sol iederman kumen, reicher und armer. und wer nicht zu den pantaidingen kumbt vor der dritten sprach, ausgenomen eehaft not oder des richters urlaub, die sind wandl phlichtig 72 dn.

Item, das auch ains ieden herrn oder junkhern holden oder scheinpot bei dem pantaiding sein sol, und ain ieder sol sein nachpawrn dabei habn. wer nicht da ist, der ist der herschaft zu Schonaw verfallen 72 dn.

Item, alle die daigen die die vierer widertreibn, der ist ieder als oft verfallen ein frevelwandl, das ist 6 ß 2 dn.

Item, alle die die irrung tetten und nicht sweigen wolten bei den pantaidingen wenn der vorsprech redt, oder an die sprach nit giengen so man si vordert, der ist ieder zu wandl verfallen 12 dn.

Item, wer die gemainen wur auslait ân der gemain willen, der ist verfallen 72 dn.

Item, wer das wasser von Matzendorff oder das wasser von Lewbersdorff abslecht und last das nit rinnen in den teicht ân der herschaft zu Schonaw wissen und willn, ist verfallen der herschaft 5 tal. dn und dem richter 1 ß 2 dn.

Item, wer auf den runst en von Matzendorff herab nicht raumbt und sich des setzt, der ist verfallen der herschaft 6 ß 2 dn und dem richter 12 dn.

Item, wir haben ain freie halt mitten auf dem Stainfeld und hinab gen Egkendorff und an die klain Vischa.

Auch haben wir ain pranger von altem herkomen mit aller gerechtigkait, alain den tod ausgenomen.

Item, ob ain schedlich man käm in ains wirts haus, so sol der wirt das dem richter kunt tuen. setzt sich der im, so sol die gemain dem richter zu hilf kumen. wer des nicht tet, der ist verfallen 10 tal. dn ân alle gnad und dem richter 72 dn.

Item, ob ainer mit ainem schedlichn pluetign waffen oder gwant kumbt in ains wirts haus, so sol der wirt das dem richter furbringen, der sol darumb fragen. tuet der wirt des nicht, ist er verfallen der herschaft 1 tal. dn, dem richter 12 dn.

Item, wie man ein schedlichen menschen aus der herschaft zu Schonaw dem lantrichter zu Dreskirchen antwurten sol, er sei lebentig oder todt: item, ain diep oder mörder oder andern schedlichen man, als er mit gurtl umbfangen ist.

Item, von ainem der sich selbs hat erhangen oder sunst ertödt, dem nachrichter abzuslahen 24 dn.

Item, das man ein schedlichen menschen dem lantrichter nicht verrer sol antwurten dann unz auf die strass an dem alten Hewweg mit gurtl umbfangn, und sol in pinten mit ainem rughalm an ein stecken, und sullen die zwen richter gegen einander steen ietzlicher mit ainem fuess in dem weg; so sol man dem richter von Dreskyrchen drei mal ruefen und im den antwurten. lest in aber der richter von Dreskirchen laufen, so sol er ain gwislhait nemen von dem ubeltetter, damit der herschaft und der gemain nicht schaden daraus ergee.

Item, was gelts oder guets bei diepen oder anderen schedlichen leuten gefunden wirdet, das bleibt und volgt der herschaft zu Schonaw und nicht dem lantrichter.

Item, ob man ain schedlichen man auf der pruggen oder in dem pach angreift, wirt er enhalb begriffen so gehört er in die Newstat, wirt er aber herderhalb begriffen so gehört er der herschaft zu Schonaw zu.

Item, es sol ainer dem andern beistant tun ein diep oder ein andern schedlichen man ze fachen. wer nicht hilft, der ist der herschaft verfalln 10 tal. dn ân alle gnad und dem richter 72 dn.

Item, es sol iederman fridper in seinem haus sein.

Item, ob man ainem bei der nacht lusmet an seinem haus oder venster, sticht der wirt oder ein ander heraus und sticht im ain aug aus, dem ist man nicht phlichtig, und man mag in zu dem richter bringen und man sol in fur ain schedlichen man haltn.

Item, ob ainer bei der nacht in ains haus kem und wolt sich gegen dem wirt nicht meldn, wirt der wirt mit im slaghaft und slecht in zu todt, so sol er in auf die gassen ziechn auf die negst wagenlais und sol im drei phenning auf das herz legen und sol es dem richter zu wissen tun und ist niemants nicht phlichtig darumb.

Item, alle die do venster oder tur oder tor aufstiessen oder daran lusmeten oder ainen aus seinem haus vordreten, haben gefrevelt 6 ß 2 dn und dem richter 12 dn.

Item, welicher dem andern in frevel in sein haus oder unter sein dachtropfen lauft, der ist verfalln 5 tal. dn und dem richter 12 dn.

Item, ob man ainen in seinem haus ubl handlt oder der wirt ainen heraus ubl handlet, haben gefrevelt 6 ß 2 dn wellicher das tuet.

Item, ob ainer aus ainem hauß lauft ainem ze hilf der schaden wil, der ist verfallen 6 ß 2 dn.

Item, alle die auf der gassen an einander sluegn bei tag oder bei nacht, sind der lherschaft wandl phlichtig nach iedem waffen besunder als hernach steet.

Item, alle die daigen die in frevel bei tag und bei nacht in die heuser wurfen, es wer mit ainem stain, der ist umb 5 tal. dn, von ainem hackenwurf auch 5 tal. dn, von ainem armbrustschuss 10 tal. dn, oder mit ainem spieß hineinstech ist umb 6 ß 2 dn, von ainem schwert 72 dn, von ainem messer auch 72 dn.

Item, ob ainer spannt auf der gassen im ernst, der ist umb 1 tal. dn und dem richter 12 dn.

Item, wer ain geladens armbst tregt oder scheust nach ainem mit ainem armbst, der ist verfallen 5 tal. dn und dem richter 16 dn. scheust er aber ainen zu todt, so ist er verfallen leib und guet.

Wirft ainer ainem nach mit ainem stain, der ist verfallen 5 tal. dn und dem richter 6 dn legt er in aber widerumb nider an sein stat, so ist er nicht darumb schuldig.

Item, slecht ainer ainen mit der hant, er ist umb 5 tal. dn rauft er in, er ist umb 5 tal. dn hat er den daum in der hant, so ist er umb 6 ß 2 dn.

Sticht ainer ainen mit ainem spiess, der ist verfallen 5 tal. dn und dem richter 12 dn.

Zuckt ainer ain swert in ernst, der ist verfallen 72 dn; steckt er es hinwider ein, ist er auch verfalln 72 dn.

Zuckt ainer ain messer uber ain, 12 dn, hinwider ein auch 12 dn.

Zuckt ainer ain taschenmesser uber ainen, 12 dn.

Zuckt ainer ain taschenmesser und wil werfen, ist verfallen 5 tal. und dem richter 12 dn.

Item, wer ainem andern sein zaun abpricht und tregt in haim, ist verfallen 72 dn.

Zeunt ainer zu nachent dem anderen und lest sich nicht unterweisen, der ist verfallen 6 ß 2 dn und dem richter 6 dn.

Item, wer do kumbt gen Salhenaw, setzt aus, hat fail und gibt hin, der ist mautfrei. setzt er aber nicht aus oder verkauft nicht, so sol er mauten.

Item, wer ainen marchstain ausgrebt, der ist verfallen 10 tal. dn und die recht hant ân alle gnad uud dem richter 1 ß 2 dn.

Item, ob ain frömbder ain marchstain setzt, der ist der herschaft verfallen 32 tal. dn und dem richter 72 dn.

Item, das man der herschaft irn dienst zu rechten teagen geben sol als aufgesetzt ist, bei dem wandl alle 14 tag 12 dn.

Item, die ganz gemain zu Salhenaw haben sich verwilligt alles das stet zu halten das zu dem sloss Schonaw von gerechtigkait wegen gehört, nichts ausgenomen, es sei mit robat oder holz fuern, als es von alter herkomen ist; doch wann si mit irem vich zu hoff robaten, daz man irem vich ze mittag hew geb und in selbs zu essen, wann si das vermainen treulich zu verdienen.

Item, es sol iederman mit seiner wer berait sein so pest er mag, wann ain lantgeschrai auferstunde, daz er das hab, pei ainer peen 6 ß 2 dn und dem richter 6 dn.

Item, geet ainem ain vich zu schaden, des das vich ist der sol den schaden lassen schetzen und ist der herschaft von iedem haubt vichs 12 dn und den schaden sol er abtragn. und der dem der schaden geschehen ist. der sol das vich dem richter stellen, und der richter sol dem vich ain slegl furlegen, und ess es davon als lang es den verlust des das vich ist. nem er aber das vich mit gwalt oder haimlich, so ist er der herschaft verfalln 6 ß 2 dn und dem richter 12 dn.

Item, wer an Salhenawer perg stain in dem weg wirft oder holz, der ist der herschaft Schonaw verfallen 6 ß 2 dn.

Item, slahen zwen an einander mit messern an dem Salhenawer perg, der ist ieder verfallen 12 dn aus der schaid und so vil hinein der herschaft Schonaw zu bezalen.

Item, wer weinper an dem Salhenawer perg nimbt, den sol man fur ain schedlichn man halten und die herschaft Schonaw sol in vast pessern.

Item, der richter und perkmaister zu Salhenaw sullen alle jar zu gewöndlicher zeit die hueter uberall am Salhenawer perg setzen, ausgenomen die Pölan darzu der richter und die gemain zu Lewbersdorff ain hueter zu setzen haben, aber nicht ze straffen. und ieder hueter mag alle nacht zum haimgeen drew weinper mit im tragen und nit mer; trueg er aber mer weinper, daz der richter und perkmaister zu Salhenaw wol beschawen sullen, so ist derselb hueter der herschaft Schonaw als oft zu wandl verfallen 5 tal. dn und dem richter und perkmaister 72 dn.

Item, in dem rebenlesen sol man nicht lenger stecken haim tragen dann ainer daumellen lank.

Item, welicher dem andern ân seinen willen und wissen in seinem paungartn auf seine fruchtperr paum steigt oder davon frucht nimbt, der ist verfallen 1 tal. dn.

Item, wer ain fruchtpern paum ausgrebt oder abslecht, der ist verfallen 5 tal. dn. hat er des guets nichts, so sol man im die hant auf dem stock abslagen.

Item, wer in ainem frid maisst, der ist von iedem stamm verfallen 12 dn.

Item, alle die die velber frevelich stumletn, ist von ieklichem ast 12 dn zu wandl. slecht er in aber gar ab, so ist er verfalln von iedem stamm 6 ß 2 dn.

Item, von ainem durrn päm 12 dn.

Item, alle die do grass schniten in ains andern garten oder wisen bei dem tag, der ist verfalln von der sichl 12 dn, von ainer segns 72 dn, von ainem wagen 6 ß 2 dn, von ainer purd 12 dn zu wandl, und dem des der garten oder wisn ist sein schaden abzetragen. geschech es aber bei der nacht, so sind si verfalln umb zwir als vil zu wandl.

Item, alle die die ainem sein vich derfueretn oder ersluegen oder erstechen in frevel, sind verfallen 6 ß 2 dn und das vich zu bezaln.

Item, ob ainem ain pherd oder ein ander tier ungeverlich zuelauft, so sol er es dem richter antwurten bei dem wandl 2 tal. und dem richter 1 ß 2 dn.

Item, alle die daigen die ainem seine leut oder dienstpoten abtaidingen und nemen aus seinem haus und prot vor ausgang des jars, der ist verfallen von im selbst 5 tal. dn und von ieder person 6 ß 2 dn.

Item, alle die daigen die das lon höhent ân des richters und der vierer willen, als oft er das tuet ist er verfallen 12 dn.

Item, alle die daigen die auf hawen, auf weinmesser, auf krampen oder hacken mer porgen dann 1 dn ainem arbaiter, der ist verfallen 72 dn.

Item, alle die stecken tragen aus pautn weingarten, die sind verfallen vom spitz 12 dn.

Item, alle die daigen die aus den öden weingerten stecken tragen, die sind verfallen 72 dn.

Item, alle die do mist oder ander unsauberkait, als das ass, an die gassn und in die päch werfent, die sind verfallen 12 dn.

Item, alle die die gräben, es sein flussgräben in dem markt oder in den krautgärten oder ander gräben, nicht raumetn zu rechter zeit als der richter und die vierer aufsetzen, die sind zu wandl 72 dn und den arbaitern die man in die gräben gewint den lon zu geben und dem richter 6 dn.

Item, alle die die verpoten stigl oder gätern hinten aus machen ôn urlaub des richters und der gemain, sind verfallen 72 dn.

Item, welicher vischet mit vischgarn oder vacht kreussen auf der herschaft Schonaw vischwassern oder stilt dem vischer sein zeug, der ist der herschaft verfallen die visch und kreussn und darzu 6 tal. und dem richter an demselben end 72 dn.

Item, welicher vischet in den gräben und wassern die in den teicht rinnen, ist verfallen die visch und darzu 3 tal. dn und dem richter 1 ß 2 dn.

Item, welicher reuschen legt in der herschaft Schonaw vischwassern, ist verfallen umb 72 dn und darzu die visch und dem richter 12 dn.

Item, von ainem gereider in dem winter ist verfallen der herschaft 6 ß 2 dn und darzu die visch und dem richter 12 dn.

Item, alle die dienstknecht die bei der nacht auf der gassen geen oder ander ir mitgesellen, die sol der richter vahn und fragen was ir gescheft sei.

Item, wer widerredt was der richter und die vierer mit gunst, willn und wissen der herschaft Schonaw machetn oder setzeten mit den andern burgern, von welicherlai notturft des markts das wer, und auch wer die pantaidingnrecht, als das hie an dem puech geschribn steet, widersprech, der ist verfallen der herschaft 5 tal. dn ân alle gnad und dem richter 72 dn.

Item, vor sant Jacobs tag sol auf der gemain niemant meen bei dem wandl 6 ß 2 dn und dem richter 12 dn.

Item, ob ainer in das prachfeld säet und im das abgeetzt wurde mit dem vich, es wer ein hieger des markts oder ein umbsäss bei uns, dem ist man nicht phlichtig.

Item, ob ainer durch ain peunt oder ain pauten agker fert, der ist verfallen 6 ß 2 dn.

Item, man soI auch auf all panfrid geen. und wer nicht zugefridt hab, der ist der herschaft verfallen 4 ß und dem richter 12 dn wer aber den frid aufpricht, der ist schuldig der herschaft zu Schonaw 6 ß 2 dn und dem richter 16 dn.

Item, es sol kain zehentner nemen den zehent auf dem veld ân wissen des der es gepawet hat oder unz der pawman das sein fuder hat gefuert, bei dem wandl 6 ß 2 dn.

Item, wer zehent hat und wolt von den hüenern zehent nemen, so sol man im ain huen geben das uber ain raif gespringen mag. item, von ainem lamp 1 helbling und von ainer kue 1 phenning.

Item, ob ain fraw die ander ubl handlet mit verpoten worten oder mit pösen worten, sol tragen den packstain oder sol der herschaft verfallen sein 1 tal. dn und dem richter 12 dn.

Item, ob ain fewr auskäm, von wem das auskäm, sol nicht von dann weichen und hat freiung unz an den dritten tag.

Item, wer den aber wolt engstigen do das fewr wer auskomen, der ist der herschaft verfallen 32 tal. und dem richter 72 dn.

Item, bei wem das fewr auskumbt uber das dach, der ist der herschaft verfallen 1 tal. und dem richter 12 dn.

Item, wo das fewr auskumbt, es sei bei tag oder bei der nacht, do sol iederman zulaufen, er sei auf dem veld oder in dem markt, und treulichn helfen retten. wer das nicht tet, der ist verfalln der herschaft 1 tal. und dem richter 12 dn.

Item, wer in der prunst raubt, es sei weib oder man, sol man anfalln für ain schedlichs.

Item, wem man prent anhieng und er dasselb verschwig also das schaden davon auskäm, den sol man puessen an leib und an guet.

Item, welicher ungerechte ellen hett oder unrechtlich messet, es wer leineins oder wulleins, was er unrechtlich gemessen hat das zu kurz ist, das ist verfalln der herschaft und sol auch dem kaufer das gelt widergeben und ist darzu der herschaft zu wandl verfalln 10 tal. und dem richter 72 dn.

Item, wer falsch wag und gwicht hette und damit weget, und was er unrechtlich damit gewegen hat, das ist der herschaft verfalten und darzu 10 tal. zu wandl und dem richter 72 dn.

Item, wer mit der hant falsch wär und wag und gewicht gerecht wer, der ist der herschaft verfallen 5 tal. und dem richter 16 dn.

Item, alle die die do furkaufen auf dem veld getraid oder anderlai, haben gevrevelt 6 ß 2 dn.

Item, der richter sol ain rechte mass haben zu allerlai und sol die nemen zu Lewbersdorff bei dem richter. und sol niemant anders habn die mass wenn der richter zu Salhenaw. auch wer zehent oder perkrecht hat, der sol vecht bei demselben richter zu Salhenaw nemen.

Item, der richter sol auch ainem ieden die mass angiessen ob si gerecht sei oder nit.

Item, die leitgeben sullen die rechten mass geben. were aber daz er uberfarn wurde mit dem anguss daz er nicht rechte mass gebe, so ist er der herschaft verfallen 1 tal. dn und dem richter 12 dn.

Item, wer schenkt und nicht ansagt den die darzu gesetzt sein, der ist der herschaft verfallen 1 tal. dn und dem richter 12 dn.

Item, es sol auch kain leitgeb nicht porgn auf pluetigs phant, auf ungewuntnen getraid und auf ungesottens garn und auf geschnitens gwant und auf all ungerechte war. wer das uberfarn wurde daz er das wissentlich tet, den sol man anfallen fur ain schedlichn man und ist das phant darzu der herschaft verfallen.

Item, alle die leitgeben die spilen lassn bei der nacht sind verfallen 6 ß 2 dn zu wandl und dem richter 6 dn.

Item, ist aber ainer nicht ein leitgeb und last spilen in seinem haus, der ist verfallen umb zwir als vil zu wandl der herschaft und dem richter.

Item, alle die den leitgeben den wein austragen uber irn willen, sind der herschaft verfallen zu wandl 72 dn.

Item, setzt ainer ainem wirt ein phant, so sol er im es widergeben umb das versetzt gelt und sich nicht verrer phenten ob er im vor etwas schuldig wer. tuet er anders, so ist er verfallen 12 dn.

Item, clagt ainer dem richter umb geltschuld, so sol im der richter phant antwurten.

Item, es sol kain wirt kainer frawen mer porgen ân des mans wissen wen umb 12 dn, bei dem wandl 72 dn.

Item, ob ainer ainem wirt ain phant setzet, so sol er es nicht lenger behalten unz der wein ausgeet, darnach sol er es lassen schetzn, bei dem wandl 72 dn.

Item, alle die irm nagsten zu nachent greifn uber das march oder den rain, es wer mit ainer hawen oder mit ainem phlueg, von ieklichem ist er verfalln 6 ß 2 dn und dem richter 12 dn.

Item, das man alle jar die muln beschauen sol umb all notturft. und die wueren pewlich zu halten. und sol haben ein ieder mulner ain gerechten metzen und halb metzen und ain mässl der 28 geen in ain metzen.

Item, ob ainem frömbden von den mulnern geverlich beschech, darumb hat in die herschaft zu Schonaw zu straffen.

Item, die mulner söllen auch der herschaft zu Schonaw und dem vischer daselbs albeg ain tag vor ansagen wann si das wasser wellen abslahen. teten si des nicht, so ist ieder mulner als oft der herschaft zu Schonaw verfallen 6 ß 2 dn und dem richter 12 dn.

Item, ob ain frömbder fluch auf ains herren oder junkhern guet, man sol in nicht mit gwalt nemen, sunder er sol dem richter geantwurt werden bei der peen 10 tal. und dem richter 4 ß dn.

Item, ob sich ain krieg oder rumor erhueb in ainem leithaus oder bei dem tanz oder bei dem krautsieden, do sol der richter gwalt haben zu schirmen.

Item, wann der richter gepeutet von herschaft wegen ainen oder mer zu fahen, da sol ain ieder berait sein und zulaufen dem richter beistant ze tun. wer das nit tet, der ist der herschaft verfalln 1 tal. dn und dem richter 16 dn.

Item, wann ainem frid gepoten wirdet, der sol frid geben und frid halten bei der peen 5 tal. dn und dem richter 72 dn welicher aber nit wolt frid geben und frid halten und sich des setzet, so sol und mag ain ieder zugreifen mit slahen und stechen. und ob er daruber geslagen wurde und des vom leben zum tod käm, des sol ain ieder gegen der herschaft unentgolten sein.

Item, ain ieder cristenmensch sol seinem pharrer und seelsorger gehorsam sein in sachen antreffent die seelsorg und gaistlichait.

Item, welicher cristenmensch zu der österlichen zeit nicht gepeicht und das hochwirdig sacrament nicht empfangn het, wer denselben behaust oder beherwergt, der ist der herschaft verfallen 5 tal. dn und dem richter 72 dn.

Item, das auch niemands die behaus oder beherberg die offenlich an der unee sitzen, bei ainer peen 5 tal. dn und dem richter 72 dn.