imrealDB

Nota, was mein herrn von Liechtenstain und ire leut rechtens ze Hahennaw habent.

Von erst so rugent se und habent das recht von alter her, das chain richter auf der von Liechtenstain gueter chain gewalt nicht haben schullen wann die von Liechtenstain selber oder wen se an ir stat seczent oder schaffent. und wann pantaiding ist, so sol der von Liechtenstain richter siczen bei disem richter und verhoren ob seiner herrn leuten icht ze churz geschëch an irem rechten; dasselb sol er vestichleich widerreden, das der von Liechtenstain leut nicht von ïrm rechten werden gedrungen. wer aber das der ïren ainer oder zwen icht ze chlagen hieten hinz der von Liechtenstain holden, so sullen die zwo chlag geschehen vor irem richter und die dritt chlag vor der von Liechtenstain richter. und wann er die chlag wil anheben, so sol er im drei tag eevor furpieten mit der von Liechtenstain richter poten, so sol der von Liechtenstain richter recht von im tün und nicht der zu Hahennaw.

Item, es sol auch der zu Hahennaw chain furpot nicht tün auf der von Liechtenstain guet wenn ir richter, als verr und ir hofmarich mit stolhoff und mit gehag umbfangen ist. und was wandel auf der von Liechtenstain guet geschechent, des durfen se niemant ze puessen ân todsleg allain.

Item, wer aber ob manslecht geschech, so sol chain richter nicht aufstossen auf der von Liechtenstain guet und mit chainem gewalt nicht herab nemen, er sol in ee vordern an iren richter, der sol im in antwurten als er mit gurtel umbfangen ist, und sol auch mit seinem guet noch mit seiner hab nichts ze schaffen haben wann die von Liechtenstain selber.

Item, mag aber der wirt dem vorfluchtigen darvon gehelfen ee das der richter zu Hahennaw chumpt und ee das er uberschriren wïrt, der wïrt ist niemant nichts verfallen.

Item, auch sind der von Liechtenstain holden inner haus oder ausser haus auf irem oder auf disem guot, wo das sei in paiden gerichten, niemant nichts phlichtig ân todsleg allain.

Item, wer aber das ein diep vorfluchtig würd und chëm auf der von Liechtenstain guet, do sol chain richter darauf nicht laufen noch aufstossen wann der von Liechtenstain richter, der sol in heraus antwurten als er mit gurtel umbfangen ist. und des diep guet das sol beleiben auf der von Liechtenstain guet und in domit gewärtig sein.

Item, auch habent mein herrn von Liechtenstain ein besunder veld genannt Chuenndarff, do sol chain herr noch chain richter auf ze schaffen haben wann die von Liechtenstain oder wen se seczent an ïr stat, es sei mit waid gras oder ekchern; wann was man darauf pawt, do sol man von zehenden; aber dasselb getraid mag ein pawman furen noch den snitern wann er wil.

Bl. 140b :

So habent mein herrn daselbs zu Hahennaw ein mulslag, und hat vor 5 lib. den. gedïnt. denselben mulslag mugen mein herrn lassen slahen wo und se wellent.