imrealDB

Pergdätting des grossen Khyriperg ob sant Cristoffn ligunt und der herschaft Neuen-Lengbach  mit pergrechtlicher freihait zuegehörig  und underworfen  sein, wie dasselbig hero befreit und pißher wie vor alten zeiten in ruebigem prauch und gueter gedächtnus  erhalten ist worden. und .erden  solche pergdating zwai mall im jar gehalten, als nämlich das erst am  manndag  in osterfeirdagen und  das ander des suntag nach sant Larentzn tag. volgt hernach beschriben.

Erstlich. so der pergmaister sitzt an däting, so soll er fragen ob es zeit sei das däting zu halten. und welcher pergnoß zu der dritn frag zwischn  zwölf und ainem nit verhanten ist, der ist zu wandl 72 dn.

Es ist auch der geprauch  und alt herkumen  das ein ieder pergnoss selbs zum dating kome. ob ine aber gots gwalt und hern gschäft, das glaubierdig erfunten wuert, verhindert, soll er ain potn darbei haben der ain erb seines guets sei.

Item, wölcher dem  pergmaister ehe das däting verlösen wiert was einrödt, der ist zu wandl 12 dn.

Item, wölcher pergnoss seine fridt, es sein art- oder pannzein, fierzöchen tag nach dem erstn däting nit guet und recht gemacht  hat, der ist zu wandl 72 dn.

Es soll auch  ein ieder an den  fierhäpern seins weingarten  kain zausse nit aufwachsen  lassn sonder sauber abrämen. ölcher das nit duet, ist zu wandl 12 dn.

Item, wölcher seinen rain so zunagst abgang der sunen ligt nit zu rechter zeit rämbt, der ist in der pergnosn straff.

Es soll auch ain ieder pergnoß  durch sein aigne stigl so zunagst abgang der sunen ligt auß und ein steigen.

Item, welcher stain und anders zausse in die rain wierft, der ist zu straff 12 dn.

Es soll auch ain ieder pergnoss den wöge  am undern ort der weingarten sauber halten, auf das fiech und leit leichtlich auf und nider gehn migen. ob aber ein wasser käm und den wög zerriss, das ain pergnoß for seim weingarten den selben ain halben tag nit machen  kunt, sein ime die negsten zwen  so die weingarten  nöben im haben den selben helfen zu machen  schultig. er solchem widerströbt, der ist zu wandl 72 dn.

Item, so zwen unainß wären und im perg zu grein und schelten oder schlagen kämen, ist der anhöber umb die recht hant.

Item, wölcher  pergnoß ain fridt vor seim weingarten  abpräch und in anderhalb tagen, es sei gleich im sumer  oder winter, nit wider zuemacht, ist zu wandl 72 dn.

Item, wölcher  pergnoß zu hörbst [oder] winderszeit, so des pfarers .cker ob der weingarten  nit gepaut sein, mist oder ert fier seinen weingarten fiern oder dragen ließ, soll er weder stain, pain oder anders nit auf die äcker werfen sonder die wendlstat sauber halten, auch wedter zausse noch anders nit aufwachsen  lassen. er das iberdrit, der ist zu wandl 72 dn.

Item, es soll auch kainer in ganzen jar zwirch iber die weingarten gehn ôn unnotwendige  ursach. er daß iberdrit, ist zu wandl 12 dn.

Item, welcher pergnoß seine rain oder anger selbs nit abgrassn tät und ain frembte  grasserin darauf befunten wuert welche  von dem pergmaister nit erlaubnus het, sol ier ain pfant genomen  werten. ob iers aber der pergnoß unbewist  des pergmaister erlaubt het, ist der pergnoß in des pergmaister straff per 72 dn.

Item, ob ainer ainem auß seinem  weingarten  stöcken, klain oder groß, außzug  oder weg  drieg haimlicher weiß, ist der in des pergmaister straff und dem  des die stöcken sein von iedem ort des stöcken 12 dn verfallen.

Item, so ainer aim ain grunt in disem  perg verkaufen wolt oder seinem kint oder freint zu lieb göben wolt, soll alles mit vorwissen und .illen des pergmaister beschechen. er das ibersiecht, ist zu straff 72 dn.

Wer rain hin haut und wëg enger macht oder frit im perg zerpricht muetwilliger weiß, der ist zu wandl den pergnossen  72 dn verfallen.

Item, welcher nit gueting fridt, dardurch fiech oder anders in perg käm  und schadten dardurch beschäch oder nit, ist der dem der frit zuegehörig ist den schaden schultig zu zalln und in der pergnossen straff.

Es sollen auch die hieter zu herbstzeiten fleissige achtung  göben damit im perg kainer iber der sunen undergang  sich begreifen lasse, auch sunst im ganzen jar kainer iber der sunen undergang sich im perg begreifen lassn. er dariber bedröttn wüert, ist zu straff 72 dn.

Es soll auch am sambstag  nach mittagleitenzeit sich kainer im perg mit arbait oder sunst befinden lassen;  es wer dann sach das ainer hauer het und zwaier weinstöcken  lang noch zu hauen hiet, soll es im auf ein halbe stunt hinnach dem leiten erlaubt sein.

Es hat auch  diser perg die freihait das kainer nit hat dran zu verpieten denn nuer pergher und der hauer und hieter umb  ier gerechtigkait.

Item, ob auch  ainer oder mer in disem perg mit abpröchung  der .einpör  durch die hieter. oder ander pergnossn begrüffen, der solle alstan fier den pergmaister gepracht werten und nach verpröchung des entfrembten guet mit straff gögen im fiergenomen  werten.

Item, ob ain schwanger weib zu herbstzeiten am perg fier gieng und an die hieter begert ain weinpör  oder zwai, sol man iers göben.

Item, so ainer in follen stock gehn  weingarten geth, der soll dem hieter drei mal riefen eh er die stigl aufpricht;  und macht er die stigl nit nach im zue, so ist er zu wandl 72 dn.

*Es sollen auch alle stigl im perg auch die zein und frit dur.chauß nach und vor dem lössn alle zeit fleissig zuegemacht sein, auf das der perg stät im friden beleibe;  .ölches stigl oder zaun offen gefunten, der ist zu straff 32 dn. er aber sach das ain ander ainem seinen fridt oder stigl zu neit ab- oder aufpräch  und der selb glaubiertig bedröten oder erfragt .uert, der ist der herschaft Lengbach ôn alle gnadt funf reinisch gulten zu straff verfallen. ob aber ainer der es säch verschwig, sol der selb an leib und guet gestrafft werten.

Item, es sollen auch alle zeit fierzöchen tag vor sant Michels tag zwen pergnossn  auß dem  obern ort und zwen  von dem undern ort der .eingarten zu dem pergmaister  kumen und den perg besehen, auf wölchen tag man den lößtag sötzn soll.

Item, wölcher pergnoß  wann man anfächt zu lösn sein pergrecht in drei tagen nit zum pergmaister  pringt, der ist zu straff 72 dn. är aber sach das er nit sovil het zu lösn darvon er das pergrecht richten kunt, soll er es iber jarsfrist zwifach richten.

Item, ob ainer ainem im perg verpotne wort göben tät, ist der zu straff 72 dn. o aber sach das sie kämen gar zu schlachen, ist der anhöber umb die rechte hant oder nach gnadn der herschaft Lengbach  10 fl. zu straff verfallen.