imrealDB

Nr. 79: Gerechtigkeit der Pfarrkirche zu Hofstetten

(Ende des 15. Jahrh.)

Vermerkt die gerechtickait die der pharrer und die chirchen zu Hoffsteten hat, die man  alle jar melden ist an an dem pantaidingen hie zu Hoffsteten.

Item, van erst hat ein idlicher pharrer oder vicari zu Hoffsteten seine holden und der kirchen zu stiften und ablait und anlait zu nemen nach altem herkumen  und gewanhait der kirchen zu Hoffsteten.

Item, was gebunter holden seint zu dem pharrhoff, di geben 12 dn ablait und 6 dn anlait, und die anderen geben nach wanheit des pharrhoffs.

Item, ob ein hold zins verzug ân eins pharrers wilen uber acht tag, so hat in der pharrer zu straffen, ausgenumen  sand Michels dienst oder zins sol ein iedlicher hold an dem rechten tag geben, sub pena 24 dn.

Item, der vogt der kirchen zu Hoffsteten ist der edel und vest Phylypp  Kling, und wass einem pharrer zu swer van seinen holden wegen, darin sol im der vogt beistant thuen und hilf, darumb sol im ein pharrer alle jar geben 6 ß dn oder ein pelz umb 6 ß dn.

Item, ob ein schedlicher man  begriffen wuert auf der widen der zu der widen  gehert, den sol der vogt zu seinen handen nemen  als er mit guertl umbfangen  ist und sol das ander guet als pei der widen  lassen, klain und gross, und  der vogt sol den schedlichen man nemen  und in fueren zu dem Kalichpach  pei dem Wasen  und  in anpinden mit einem oder zwain halben und dem landrichter zu dreimal ruefen;  kubmt er und nimbt in, da pei bestets;  kumbt er aber nit und reist sich der schedlich man  ab, des ist der vogt und die widen und die holden unengolten gegen dem landrichter.

Item, welcher nit pei dem panthaiding  ist, der ist 72 dn pro pena.

Item, ob ein streichender dieb wuert begriffen auf der widen, so sol in der vogt zu seinen handen  nemen, und wass er guetz pei im vindt das ist dem vogt vervallen, da mag  im der landrichter nit einsprechen wenig noch vill, und sol dan den dieb nemen und in antwuerten zu dem Kalichpach als oben geschriben ist.

Item, der wiltpan auf allen guetern die zu der widen  geheren, ist eins pharrer, der mag  in jagen oder van im lassen, vogl vachen oder vahen lassen als weit sein grunt sein ân alle ierrung, als von alter her ist kumen.

Item, ob ein edelman fräflet auf der widen mit armbrust, spiessen oder werhafter hand, wer der ist, vervallen zu wandel 32 tal. dn.

Item, ob ein schlecht gemainer man fräflet mit armbrust auf der .iden, der ist vervalen zu wandel 5 tal. dn.

Item, hebt einer ein stain auf piss uber das knie und wuerft nit den stain, so ist er umb 2 und 6 ß dn.

Item, frafelt einer mit einer hacken, so ist er umb 5 tal. dn.

Item, fräfelt einer mit einem  stecher oder degen oder jungerlein  das man in uberweist  das er es plass gehabt het in einem ermel oder sunst unterm gewant, so ist er auch umb 5 tal. dn zu wandel.

Item, fräfelt ainer mit einem spiess auf der widen, so ist er auch umb 2 und 6 ß dn.

Item, fravelt ainer mit einem schwert, so ist er auch 72 dn.

Item, fraflet ainer mit einem messer, so ist er auch umb 72 dn.

Item, wer einem  zu nahend  ackert oder rainstain verkeret oder uberzeinet, der ist umb 72 dn.

Item, wer abhacket felber oder stosfelber, als oft ein stam als oft 72 dn.

Item, wer abhackt holz oder abmaist, als oft ein stam als oft 72 dn.

Item, wer einen geschlachten paumb  abhackt, der ist umb 72 dn.

Item, ob einer ainen auf seinen grunden angriff und in netten wolt .n recht mit gewalt, wo man in erfuer, den mecht  der vogt aufhalten.

Item, ob ainer der ein hold wer der widen, ob er verhandlet mit messer, mit schwert oder welcherlai waffen, so ist er umb 24 dn.

Item, ob ainer mit der faust schlueg, und hat er den daum  ausserhalb der hant so ist er umb 5 tal. dn, hat er den daum in der hand so ist er um. ß dn.

Item, alle die handl die oben geschriben sten seind albeg die zwen tail des vogts und der drit tail des pharrer.

Item, so eine gemaine landsteur van einem landsfuersten auferstund, oder ander gemaine anschleg antreffund, auch so ein steur so man nend di weichsteur einen pischolf zu Passau antreffunt mit willen des landfuersten auf di pharr zu Hoffsteten mit sambt den holden so darzu geheren angeschlagen  wuerd, der selbig anschlag sol durch ein vogt und den pharrer oder vicari an zaiten daselbs oder wen der vogt an seiner stat darzu ordent, aintrechtiklich und treulich beschehen;  und welcher holt solich anschlag  oder ander  gerechtikait nit zu rechter zeit ausrichten .uert, der ist dem vogt und dem pharrer vervallen nach ier paider genaden, darinen dan der pharrer den tritten tail hat.

Item, wer gewaltiklich penk oder tisch haben var dem freithoff auf der widen grunt und ander leut ierren wolt, als oft er das thuet so ist er umb 72 dn.

Item, wen  einer auf der widen valtar zuhacket oder abhacket oder zaunstecken abhacket, der ist umb vervallen dem vogt oder dem pharrer van dem valtar 2 und 6 ß dn und van den stecken 72 dn.

Item, alle stecher und merlich hacken sein verpoten, und wo man aine findt, so sol man  ims nemen  und ist vervallen zu pues 5 tal. dn und zu straffen an leib und an guet.

Item, wan man fail hat zu sand Jeorgen tag oder kirchweich  var dem freithoff, so sol ein ambtman und zechmaister absameln auf der .iden van alen kaufern und kauferin und dem pharrer mit andern guet des gotzhaus verraiten.

Item, wer feur uber die gassen trueg pei nächtlicher weil unbewart, als es geschiecht van trunknen, der ist vervallen 5 tal. dn, und wer es aus dem haus gibt der ist auch um. tal. dn.

Item, wer einem uber sein traid und grund gedt und fert und sein viech treibt mit gewalt und nit mit seinem willen thuet, der ist vervallen als oft er das thuet ain haubt viech als oft 72 dn.

Item, wen einer ein viech phend und man nimbt das viech wider, und hinnach kumbt  nit an sein willen und tregtz in den hahen muet hin, .as der vervallen ist. Ist auf der widen so ist er vervallen dem vogt und dem pharer di pues, ist aber eins andern herrn so sol man klagen.

Item, ob einer auf einem guet wer und das nit vermacht und failetz nider und prachtz enwicht, wass der vervalen wer. Das stet pei dem vogt und dem pharrer. Und  der nachpaur der pei im sitzt und das wol sech und nit anprecht, was der auch vervallen ist. Das stet auch  pei dem vogt und pharrer;  und solen ein holden setzen der dem pharrer fueglich ist in kuerz.

Item, wen einer ein grunt verkauft aus einem erb ân wissen des gruntherrn, das sol er nit thuen ân eins herrn wissen und willen. er das uberfert, der sol schwerlich gepessert werden durch  den gruntherrn.

Item, ob einer ein frauen oder ein frau die ander ubel handlen oder pese wart zuzeucht auf des pharrers grund oder einer neten wolt, den sol man straffen an leib und guet, und die frau di der anderen unrecht hat than di sol den pogstain tragen.

Item, wen  ainer den andern etzt mit frävel, der ist der herschaft zu wandl 2 und 6 ß dn.

Item, welcher einem  seinen frid aufpricht oder hackt in frävel, al die schaden di er emphacht  die sol er im ablegen und ist zu wandel 2 und 6 ß dn.

Item, kainer sol gevarig oder peissund viech oder hund, schlahund oder peissund ross oder stassund viech das den nachpaurn  wissen ist behalten. beschäch aber das nit, wass schaden davan  komant, die ist phlichtig zu puessen  und abzulegen, und darzu sol in der vogt straffen nach seinen genaden, darin der pharrer auch den dritten tail hat.

Item, kainer der widen  hold sal geheissen oder parig werden fuer ein anderen der eins anderen herrn ist. wer das uberfuer, der sol pessert .erden  van dem pharrer oder vogt.

Item, kainer der sol schedlich leid behalten in seinem haus. er das uberfuer, der soll gestrafft werden an leib und an guet.

Item, wass einer van dem anderm kauft und der kauf mit einem phening  bestät wiert, so sol er alzo hinfuer stät beleiben, und welicher des kaufs abgieng, der ist dem andern phlichtig sein schaden  abzulegen und ist zu wandel 72 dn. nimbt aber der kaufman des gutz nit zu rechter zeit auf den tag und er van im kauft hat, so mag der hingeber sein guet geben  wem  er will und im sein schaden abtragen den er genumen hat, und zu wandel 72 dn.

Item, van einer frauen di ein man  hat, da sol man nit teurer van kaufen als umb  12 dn, dan ausgenumen mit iers mans willen.

Item, kain hold der zu der widen gehert, sol auf kain chandlmal  gen, und wer das uberträt der ist zu wandel 72 dn.

Item, kainer sol auf laistung nit gen, besunder den di einem anderen herrn zuegeheren,  und wer  das ubertrit der sol geben zu puess 5 tal. dn ân alle genad.

Item, ob einer auf der widen wer der nit geharsam wer, so sol in der grunther  und vogt geharsam machen  und umb  sein ungeharsam straffen.

Item, was puerkrecht sein di zu lechen sein van dem pharrer oder kirchen, die mag ain ieder pharrer wo und in den verlust, ân menik- lich ierungdarin zu tain, verleihen;  nuer alain recht erben, das weislich ist, di mugen  verpot darauf thuen mit des pharrers ambtman  willen. er aber das wuert uberfarn oder tretten, der ist vervallen zu puess 2 und 6 ß dn.

Item, das des pharrers und ander herrn hollen pessern di weg, der sie sich järlich geprauchen muessen. er das nit thuet, der ist vervallen 2 und 6 ß dn.