imrealDB

Unbefuegt von Sewastion Hager wegen des hern von Zwëtl pantaiding anlangen und begern.

Hanns Scherrer richter zu Allentsteig, Wolfganng Stoltznperger daselbst, Cristan Herwartter ambtman zu Oberndarff sein durch Sebastion Hager, als den 27. januarii des [15]47ten jars das pantaiding zu Glognitz gehalten worden, geschickte kumen und erlaubnus zu reden begert, das ine vergonnt worden, grueß dem hern und aigenmaister von seinem hern gesagt und anzaigt ier herr hab si dahin geschickt in dem taiding ze sitzn, ob was landgrihtmässig verhanden zu horn, irm hern anzuzaigen; und auch neben furgeben sein herr hab sich zuvor beschwärt das der herr alda zu Glognitz das taiding besitzt, das er noch thue. darauf ine vom herrn durch Wilhalbm Staindorffer der selben zeit seiner genaden aignmaister antwurt geben worden: er der herr abbt zu Zwetl besitz das taiding da und anderstwo mit seinen leiten, handle darin nach vermög des gotshaus freihaiten; kume was lantgrihtmassig fur, er wisse sich, sein gotshaus und arme leit gegen dem lantgricht vor schaden woll zu hueten; versehe sich auch werde der Hager da und anderstwo mit den seinigen zu taiding kain ordnung geben; er der Hager hab neulich das landtaiding gehalten und besessen; hab ainer was lantgrihtmassig verschwigen, der entgelts; wis sein pantaiding woll zu halten; und darauf zu zeuknus alle die gemain so verhanden gewest petten das er Hager ine den herrn abbt zu Zwetl sein pantaiding ze halten wern will. ist ine auch in dem pantaiding ze sitzen aus ursach das es von alter nit herkumen abgeschlagen worden, das si zeugnus begert. es sein auf disen tag ins pantaiding von dem herrn abbt geen Glognitz, alda es besessen worden, Ottn dapei Hermans Germans und Neitzn ervordert, die all mit- und beigewessen.