imrealDB

Hie sind ze merkchen die recht des dorfs ze Stretzing, die man jerleich melt in dem iren pantaiding, und wie verr irew gemerkch gent.

Item, von erst auf dem Grassigen weg, von dem Grassigen weg dornach auf di lantzstrozz, von der lantzstrozz dornach an den Lintperig daz do stosset an das veltgericht, darnach auf den Arlhartzpartz, von dem Arlhartzpartz darnach an das weingertel genant di Rützen, und darnach unz an den Saichelpuchel, und von dem Saichelpuchel darnach als verr di Lehenekcher gent gen Praittenreizz.

Hie hebt sich an di erst frag.

Item von erst, das man das taiding pannen schol. wer das verprechtiet, ist das ain edelman der ist vervallen 32 pf dn, item ist ain purger 15 pf, ist es aber ain gemainer man 10 pf dn.

Item, wer in das taiding nicht chem und mit willen das verseß und hietz doch ruefen hören, ze wandel 72 dn.

Item, freie viechwaid auf dem Grassing weg. item, und freie waid gen wald auf und ab, und geit man von ieder chue 2 dn dem vorstmaister von der waid.

Item, das ieder man ze Stretzing der roß und wagen hat, der mag all erichtag ain fuder holz nemmen aus unsers herren walt, wintfell, dürs holz das unschedleich sei, welicher lai holz das sei, do schol man chain nicht in engen, do geit ieder man sein recht umb 30 dn.

Item, wer auch ödrecht hiet oder abprunn, do gott vor sei, der schol zimerholz nemen in unsers herren holz und wald ân all anfal.

Item, das auch ir metzen gefecht schol sein an der Hederstorffer metzen.

Item, weinmaß und mostmaß schol gefecht werden an Kchremser maß.

Item, die pekchen schullen als Lewbser pekchen pachen.

Item, die pekchen die nicht recht puchen, das es ze chlain wer, ze wandel als oft er das thut? 72 dn.

Item, wer in dem aigen prat verkauft ab den wegen, wan man es dar fürt, ze wandel 72 dn.

Item, die pekchen und die ladner di do prat fail haben und lassent die arbaiter ân prat in der wochen, als oft er das thut? ze wandel 72 dn.

Item, ob das wer das di ladner prat frument von den pekchen, das sew ez chlain haissent pachen das si dester paß und mer gewin haben, das wandel 6 ß 2 dn; wenn man schol in nach zehen phenbert nur ains zugeben.

Item, das sew auch mosmaister hie schullen haben. und chain fleischakcher schol nicht slachen, er laß den mosmaister ee wissen das er es peschaw, oder er wer ze wandel 72 dn.

Item, die fleischakcher die haimleich viech slachen in iren heusern, der ist ze wandel 72 dn.

Item, welicher fleischakcher nicht ain phenbert fleisch geit, ze wandel 72 dn.

Item, welicher fleischakcher underrains fleisch vail hat und nicht ain strobeins chrenzel auf hat, der ist ze wandel 72 dn.

Item, wan die fleischakcher in der wochen das aigen ân fleisch lassent, so sind si ze wandel ir igleicher als oft sew das tun?t 72 dn.

Item, welicher fleischakcher hiet fleisch und wolt sein nicht geben, als oft er das thut? ze wandel 72 dn.

Di ander sprach.

Item, das in auch mein herr chain richter nicht setzen schol ân der gemain willen.

Item, das auch der richter chain halter nicht setzen schol noch dingen ân der gemain willen.

Item, der richter schol haben ain lehen unverdient und ain chue unverlant.

Item, der auch pesunder halt und nicht zu der gemain sein viech slecht, der ist von iedem haup, es sei chlain oder groß, ze wandel 12 dn.

Item, wer auch ain chue uber veld lett oder sein viech, ez sei chlain oder groz, in der ersten halben schutt, der ist dem herter des lans halbs phlichtig.

Item, welicher fleischakcher viech besunder halt und slecht hie und hat gemainschaft mit ainem uber veld und verkchauft das fleisch nicht hie, als oft er das tut? ze wandel 6 ß 2 dn.

Item, wann auch der richter ainem oder zwain frid peut von der herschaft wegen oder gerichts wegen und sein nicht achten wil, der ist ze wandel 5 pf dn.

Item, wer auch hie ze chirichen und ze gassen gett, der schol in unser pantaiding gen, er sei wer er sei, und sich verantwurten umb we man hinz im ze sprechen hat.

Item, wer aus dem gericht dingt fur den vokt, der ist ze wandel 5 pf dn.

Item, wer auch mit pehafter wer her auf di grunt gett und werft leut mit im, ze wandel 32 pf dn.

Item, wer ain slecht der der gemain diener ist unverschult, der ist ze wandel von iedem haus 72 dn.

Item, wer ainem dienunden chnecht under der gurtl abzeucht und phent, das wandel 72 dn.

Item, wer mit spiessen oder mit armsten auf der stroß gett mit gever, das wandel 32 pf dn.

Item, wer auch ain aus seim haus vadert, ze wandel 6 ß 2 dn.

Item, wer ain mit offner hant slecht, ze wandel 5 pf dn; und wer ain mit der faust slecht, ze wandel 1 pf dn; und wer ain mit palig mit all slecht, ze wandel 6 ß 2 dn.

Item, wer ain mit ainem stain wirft und trift in, ze wandel 1 pf dn; trift er aber nicht, ze wandel 72 dn.

Item, wer auf der strozz zucht und niemant slecht, ze wandel 12 dn.

Item, wer ain slecht das er pluetrunsig wirt, das wandel 6 ß 2 dn.

Item, wer auch schant anhebt in den leitheusern und mit willen liecht underslecht, ze wandel 6 ß 2 dn; und wer sein engilt, dem schol er sein schaden abtragen.

Item, wer sich auch verpotner hab underwintt ân des richter willen und wissen, das wandel 32 pf dn.

Item, wer auch aim lusmet an sein haus oder venster und siecht es der wirt und chumpt heraus und slecht den lusmer ze tod, so ist der wirt niemant phlichtig. slecht aber der lusmer den wirt ze tod, der ist der herschaft vervallen leibs und gut?s.

Item, ob auch das wer, do got vor sei, das ainer den andern ze tod slug, so mag der richter dem selbing zusperren und beschawen unz auf meins herren genad umb 32 pf dn.

Di dritt sprach.

Item, wer auch an dem rechten diensttag nicht dient, ze wandel 72 dn.

Item, wer aus seinem haus unflat geust auf di stroß und das nicht fuder fur?t, als oft er das thut? ze wandel 72 dn.

Item, wer auch nicht pei dem taiding ist, ze wandel 72 dn.

Item, wer nicht die molphenning geit zu dem taiding, ze wandel 72 dn.

Item, wer sein lehen unstiftleich legt zu veld oder ze dorf, den schol man swerleich pessern.

Item, wer wein schenkcht und nicht di recht moß geit, ze wandel 72 dn.

Item, die verpottnew wart sprechent und ausgebent, ze wandel 72 dn.

Item, die weib di ubel an einander handelnt, das wandel 1 pf dn oder si schol den pokchstain tragen.

Item, die nicht frident ir weingarten oder akcher, ze wandel 72 dn.

Item, ob auch das geschech das zwenn ain chauf mit einander machten und sew gerewet, und ob es ir paider willen wer das der chauf abgieng, die sind niemand darumb phlichtig; es wer dan das der ain den chauf stet hiet und der ander nicht, der ist ze wandel 6 ß 2 dn und schol dem andern sein scheden abtragen.

Item, ob auch das wer das ainer dem andern ain paum oder weinstokch abslug? von neitz wegen, der ist verfallen 5 pf dn oder di hant.

Item, wer auch das geding widertreibt und die vierer, der ist von iedem haus ze wandel 72 dn.

Item, wer di vierer widertreibt wan sew auf den friden gent und markch stossent, ze wandel 6 ß 2 dn.

Item, wer markchstain ausreut und im selbs maricht ân seins nachtpawrn willen, das wandel 5 pf dn.

Item, wer dem anderen sein rain hin hawt, ze wandel 6 ß 2 dn.

Item, wer ainem dem andern knecht oder diern verdingt ee das sew urlaub haben, ze wandel 6 ß 2 dn und trag im sein scheden ab.

Item, ob das wer daz ainer ainem sein tochter hinweist oder muemen, der ist ir nicht phlichtig ze geben.

Item, wer auch mist oder strab ab dem aigen geit, ze wandel 72 dn.

Item, wer arbaiter ab dem gut? weist uber veld, als oft er das thut? ze wandel 72 dn.

Item, es schol auch chainer nicht mer pawn denn ain jeuch uber veld. wirt er aber uberfaren das er mer pawt, so ist vervallen ze wandel ân alle genad 6 ß 2 dn.

Item, ob auch das wer daz ainer oder ainew weinper abprech und der hut?ter in begriff, phentt er in, und das phant schol er dem richter antwurten; der ist ze wandel 72 dn.

Item, wen aber das pei der nacht geschech, das gehor?t den lantrichter an.

Item, wann auch das wer das ainer oder ainew ain knecht hat und im swert, spieß oder hakchen versetzt hinz dem leitgeben und der leitgeb wol waizz das es nicht sein ist und geit im wein darauf, so ist der leitgeb vervallen ze wandel 72 dn.

Item, ob auch ainem gestollen wurt in seim haus und pegriff der wirt den deup mit dem gut?t dennoch in seinem haus, nimpts er dem deup das gutt, der ist dem gericht nichts phlichtig innerhalb der dachtrophen.

Item, wan ain fewr auschumpt hinz ainem ân sein willen und wissen, der sol drei tag freiung haben. entrunn er aber dovon ân willen und chöm ainer der in dovon drung und meins herren freiung nicht hielt, der ist vervallen leibs und gutts.