Korneuburg, Urfarrecht (Mitte des 15. Jhs.)

Vermerkt das urfarrecht pei der stat.

Item, kainer sol nach ainer warr laufen in di stat. wër aber das tët, so ist er dem richter zu wandel 12 pfennig und den urfarer was er di fart dient.

Wan ain harr kumpt, di mag er behalten an den dritten tag also beschaidenlich ân der marktzullen schaden.

Wan ainer 2 tal. wert hat auf dem poden, der sol annemen und ander niemants; und wer des nit tët, der wër dem richter zu wandel 72 pfennig.

Item, kain urfarer sol kain war aus seinem haus tragen an sein zullen. wër awer das er das tët, so ist er dem richter phlichtig zu wandel 12 pfennig.

Item, ob ain urfarer vier menschen oder daruber in seinem haus hiet, di mag er wol zu ainer harr annemen. ist es awer hinder vier persan, so hat es nicht kraft.

Di marktzullen di hat das recht: an dem erichtag und an dem sambstag sol ir nimant kain infail tuen ân gever als lang unzt di mess zu sand Niclas fuer ist; darnach mag ieder man seinen frummen schaffen als mit alter herkomen ist.

Item, wer der ist der ain zullen ân der urfarer willen an di aw oder aus dem urfar fuert, der ist zu wandel 12 pfennig; und wer das verswig am urfar, der ist dem richter 12 pfennig.

Item, wer im urfar wider der urfarer willen austrët, welicher lai das ist, der ist verfallen dem richter zu wandel 72 pfennig.

Ob ain fluchtig man käm und hiess sich hindan von dem urfar fueren, und chëm darnach der stat richter oder sein anwëlt und beruefet den selbigen man, und ob er in an das land nicht pringen von gewalts wegen möcht, darumb ist er dem richter nichts phlichtig.

Item, wen ainer an sein zullen annimbt es sei leut oder guet, und kumbt ein ander und spricht "gee her an mein zullen, ich wil von dir nemen ain ringen lan" und pringt den mit solichen warten an enes zullen, der hat verlaren alle seine gerechtikait des urfars.

Bl. 16a.

Vermerkt: di marktzullen pei der stat Kornnewnburk di verlëst man den schefleuten gemainklich ain jar umb 10 tal. pfennig.
Standort
Korneuburg | BH: Korneuburg | Bundesland: Niederösterreich | Eigentümer: Korneuburger Stadtarchiv | InvNr.: Cod. Sign. I | Seiten: 14a-15b |
Herkunft / Fundort
Korneuburg | BH: Korneuburg | Bundesland: Niederösterreich |
nähere Angaben
Entstehung: 1440 - 1460
Literaturhinweise
Gustav Winter (Hg.), Niederösterreichische Weistümer. Teil 2: Die Viertel ob und unter dem Mannhartsberg (Österreichische Weistümer 8). Wien-Leipzig 1896, S. 341-342, Nr. 54 (Edition).

Kategorien: Rechtsquellen | Taiding - Dorf | Taiding - Herrschaft

<< zurück